بص يا عم الزمن اللي هو
تقوله كويز يقولك تجارة
وكل حاجة فيها شطارة
تجارة جميلة مكاسب كتيرة
لا تقوللي اقصى ولا حتى المدينة
المهم املى بطني بفواكه كبيرة
بس اصلية... مش بتاعة العامة الحقيرة
اصل فيها مواد خطيرة
قالوا انتخابات وليلة كبيرة
حرية... ديمقراطية... وكدبة كبيرة
وقبل الكلام كانت النتيجة محسومة
فازوا بنجاح ساحق والعدالة معدومة
وطرقهم للنجاح معروفة ومنظومة
يزوروا... يشتروا الصوت
ولو منفعش... برضو البلطجي موجود
ويطلع علينا الخسران الحقود
ويصرخ بعلو الصوت
دول زوروا. دول بلطجوا. دول اشتروا الصوت
ويطلع علينا الباشا الكبير, زعيم حزب الحمير
يقول له امشي ياواد... بطَل نعير
دي انتخابات نزيهة وفي منتهي الفير
... وبعد كام يوم من الليلة الكبيرة
دي عبارة غرقت وضحايا كتيرة
قالولنا حريقة وقالوا سريقة
وتوهونا عن الحقيقة....
قولنالهم صاحب العبارة اهو
اللي غرقنا او اللي حرقنا او اللي سرقنا اهو
قالولنا ازاي يكون هو
ده في قلب الحكومة من جوه
وبين هو او مش هو... هرب هو
وطلع علينا الباشا الكبير زعيم حزب الحمير
وقال : ايه يا ناس يا تعبانة
ده راجل عنده حصانة
وراح لندن يزور خالته العيانة
والله دي ناس جعانة
بيشتموا فينا زي الكلاب السعرانة
ولا هيرتاحوا غير لما ياخدوا
اخر هدمة مغطيانا
**********************************
فرعون الجامعة
فرعون قاعد على البوابة ومفتح عينيه
خايف لحد ينطق بكلمة حق من حواليه
قالولنا ان فرعون من غيره الجامعة تخرب
غيَبوا عقولنا واحنا المجانية منا بتهرب
شوفوا طلاب هندسة كليتهم ولعت بيهم
كان فين فرعون وحرسه ورجاله اللي مخاويهم
كانوا مشغولين شوية بكبت أي حرية
وقتل أي نية لحق يطلع فيهم
جامعة بقانون اعمى محكومة
فرعون فيها هو الحاكم والحكومة
الحكم هو رغبته والكل خدامه
يمشي ورا شهوته وعلينا احترامه
جبروته نازل علينا واحنا مش بأيدينا
غير اننا نركع ونقول قدامه : عاش عاش فرعون عاش
أبداً...
هما نهابين القوت , خرابين البيوت
واحنا الطلبة للحق صوت
وعمر الظلم ماهيسكَت للحق صوت
هنفضل على طول
نهتف ونقول
يسقط كاتم نفسنا ... يموت فرعون يموت
**********************************
شارع الأزهر
كنت ماشي في شارع الازهر وكان فيه كمين
وقفني ظابط وقالي انت اللي فجرت الحسين
يا عم الظابط طب ليه ... وانا ليَا في الحسين ايه ؟
لا ليَا عدو عايز اربيه .. ولا ليَا قانون في مجلس عايز اعديه
روح شوف مين كان ده في مصلحته واقبض عليه
وياريت تقوله مكانش ليها عازة الحكاية ديَه
ده القانون معدي من مجلس ولاد الغبية
ولا ضغط دولي طول ما راكع للصهيونية
"اخرس يا كلب
انت إرهابي وابوك إرهابي
يا شعب خونة اجمعين"
يا ظابط فاجر زي اللي باعتك
انا اللي خاين ولا اللي باع الهوية
اللي صدَر غازنا للدبابة الصهيوينة
اللي بنا "بعز" جدار عازل للكلبة ديَه
اللي شارك في الحصار واللي دافع عن الدمار
واللي خلَانا ماشيين بعار
يا عم الظابط احبسني
من بداية الكون وانت السجَان وانا المسجون
وتلاقونا احنا الاتنين بميت لون
انا كنت مع الصعاليك والحرافيش والثوَار
وانت كنت مع الدرك والقلم السياسي والاستعمار
وافتكر ان كل ما تحبسني الناس بتبقى معايا
تقوم ثورة وتكون بداية النهاية
نهاية كل ظالم ... ونهايتك معايا
