Thursday, May 10, 2007

ياخي "........." على عصر حقوق الانسان

كنت بادور على الفيديوهات اللي كانت بتتكلم عن أبو غريب العراق على موقع يوتيوب عندما فوجئت بهذا الكليب عن التعذيب في سجون الولايات المتحدة لمواطنين أمريكان خصوصا في شيكاجو و فلوريدا

المهم في هذا الفيديو أنه يعتبر لطمة شديدة على قفا كل من راهن على الضغط الامريكي على النظام المصري في سكة انهاء التعذيب في سلخانات الشرطة كما أنه يوضح خبل وبلادة المراهنين على المشروع الأمريكي لنشر مبادئ حقوق الانسان وبالإضافة الى ذلك فهو يفضح ادعاءات الولايات المتحدة و ذيولها في جميع أنحاء العالم وخصوصاً بعض مثقفي العالم الثالث الذين يرون في الولايات المتحدة رمزاً للديمقراطية والحرية وحقوق الانسان



أسيبكوا مع الفيديو ومنتظر تعليقاتكم

تحذير : الفيديو به مشاهد صادمة جداً


5 اترك تعليق:

Anonymous said...

شوف فيه نقطتين مهمين جدا انك تفرق بينهم.. اللي يراهن على المشروع الأمريكي يبقى غبي ويستاهل اللي يجراله، كلام سليم

لكن في نفس الوقت لازم تعترف أن في امريكا بقدر اختراقات حقوق الانسان، بقدر ما فيه فضح للاختراقات دي

يعني مثلا الست الصحفية اللي عملت الفيديو اللي انت عرضته كانت متأكدة من قبل ما تبتدي التصوير انها مش هتاخد ست شهور سجن، وان الشرايط بتاعتها مش هتتصادر، وان مفيش حد أهبل هيتهمها بتشويه سمعة أمريكا - قارن ده بقى باللي حصل لهويدا طه اللي النظام المصري عملها عبرة لكل من يفتح بقه في موضوع التعذيب من هنا ورايح

الفيديو نفسه بيقول ان بوش اعتذر عن التعذيب في ابو غريب.. بوش ابن ستين كلب يا سيدي، ودموي، ومعتوه ومبيعرفش يتكلم كلمتين على بعض.. احنا بقى عايزين حبيب العادلي، بلاش حسني، يعترف بالتعذيب اللي بيحصل للمصريين ويعتذر عنه

Monzer said...

جزاكم الله خيرا
طبعا خاسر كل من راهن على أمريكا
والى مايل على امريكا مايل على حيطة من ورق
وأمريكا مالهاش حبيب
وأمريكا مابتخدمش حد
أمريكا يتقل فيها كلام من هنا لبكره
تحياتى ليك

Anonymous said...

شاهدت الفيديو وفعلابه مشاهد صعبة
اوي يكفي ان يجرد المرء من ملابسه فماذا بعد ؟؟؟ هذا حقا هو العالم الذي نعيش فيه ليس هناك حريه ولا حقوق ولا امان ارجو ان يتعظ هؤلاء المتأمركون ويرون الوضع علي حقيقته ليس هناك عدل بين البشر علي الاطلاق الا عدل الرب وصدق قوله " ظهر الفساد في البر والبحر بما كسبت ايدي الناس " وقولوا جميعا وداعا ايها الإنسان وداعا ايتها الحرية لن ننتظرك لانكي لن تعودي حقا
عصفورة وقعت من اعلي الشجرة

mashahed said...

طب بأوللك ايه !!! أنا مافهمتش حاجة من اللي انتا قولته ده " إنسان ..... وعصفورة ....وشجرة..... ولن تعودي حقاً... وبتاع"!!

ايه ياعم واحدة واحدة مش كده

مش كويس علشان نفسيتك الكلام اللي انتا بتقوله ده

عموما فعلاً انا مافهمتش فلو عندك نقطة فعلاً حاول توصلها تاني واعذر جهلي

Anonymous said...

افهمك قصدي ايه
اقصد ان مفيش عدالة دايمة ودي حقيقة لانك اصلا كتير اوي بتظلم نفسك وغيرك
ومش بتكون عادل
انا نفسيتي زي الفل دلوقت ووقت ما كتبت لك التعليق كانت حقوقي ضاعية ولسه بس طبعا لازم اعيش واكمل حياتي واتكلم واطالب بها مهما حصل بس ده الواقع اللي بنعيشه
اما بالنسبةللعصفورة هي الحرية وحقوق الانسان انا عن نفسي كنت شايفها عصفورة جميلة جدا ملونة واقفة علي شجرة عالية بمعني انها شيء مقدس وحترم لكنها وقعت علي الارض ودوسنا عليها برجلينا معلش يمكن التعبير غريب شوية لكن انا فكرت في كده حاسه انها اسمي شيء في الوجود
عصفورة