جربت مرة تركب تاكسي وتتكلم مع السواق في السياسة ؟
جرب وأكيد هتلاقيه اكثر وعيا من أكبر مثقف مفلطع ومقعر ... اتعودت اعمل كده من أيام ما كان فيه حاجة اسمها كفاية بجد وكنت حاسس انها ممكن تعمل حاجة فكنت باتكلم مع طوب الارض يمكن يصدق كلامنا وييجي معانا.... نجحت الطريقة دي أكثر من مرة مثلاً سائق السيارة اللي كنا مسافرين بيها المنصورة يوم مظاهرة كفاية بالمنصورة قرر انه يركن سيارته ويروح يتغدى وييجي على المظاهرة وكذلك سواق التاكسي اللي رحنا بيه الدقي يوم مظاهرة المعتقلين كان بالصدفة ساكن في الدقي وراح ركن عربيته تحت البيت وجه وقابلته في المظاهرة ...... المهم انا اللي خلاني أكتب ده اني ركبت امبارح مع سواق تاكسي معاه اعدادية ويقرأ بصعوبة وحاولت اني اتكلم معاه في مشكله تخصه هو كسائق فبدأت اتكلم معاه عن مشروع تاكسي العاصمة اللي هايكون افتتاح مشروعه غدا صباحا أمام مجمع التحرير ففوجئت به بيبص لي من فوق لتحت كأني باهرج أو باقل أدبي عليه وبعد كده خد نفس طويل من السيجارة بتاعته وقال ( تاكسي العاصمة ايه وهباب ايه المشكله أكبر من كده بكتير ياباشمهدس البلد كلها بتنطحن ومافيش حاجة بتتحرك)بصراحة أنا كنت متفاجئ فسألته يعني ايه؟
فقال انه مثلا اسر ضحايا العبارة لسه ماحدش صرف لهم مليم أصلا من يوم ما غرقت العبارة وانهم امبارح كانوا واقفين عند دار القضاء العالي طبعا ساعتها قلت لما اقول له بقا ان انا في حركة كفاية يمكن أعرف اضمه - وبعدين فكرت أضمه لايه وحركة كفاية انقرضت من زمان - المهم قررت اني أكمل كلامي معاه زي تسلية يعني ففوجئت بانه ابتدى يهزأ حركة كفاية وكل المعارضة المخصية من وجهة نظره اللي مافيش حد فيهم فتح بقه لما اتأجلت انتخابات المحليات وطبعاً نال الإخوان المسلمين النصيب الأكبر من هزائة السواق وقال انهم شجعان جداً وهو شاف بعينيه ناس منهم بتنضرب لحد ما تتعور وتبقى بتموت لكن ماتحركوش من أمام لجان انتخابات مجلس الشعب لكن لما اعلن مبارك تأجيل انتخابات المحليات كل واحد من دول حط لسانه في ........ أمه - والكلام على لسانه برضه - وده حصل من وجهة نظره لأن المعارضه اللي موجوده قدام عينيه معارضة مخصية.... حاولت اقنعه انه فيه معارضة شريفة بس عددهم صغير وقوتهم محدوده .... لكن ولا الدموع الراجل كان مقتنع بانه معارضة مصرية = معارضة مخصية كانت هذه هي نقطة خلافنا أنا وهو
لكن في الاخر أنا قلت ( أنا معاك ان معظم المعارضة في مصر بتشتغل لأهداف شخصية سواء بمعارضة النظام أو بالضحك على الدقون بانهم يعارضوا اللي مسموح لهم بمعارضته واللي مش مسموح لهم بمعارضته كأنهم ماشافوهوش) ومن هنا وصلت لاقتناع شخصي وهو
تسقط المعارضة المخصية
عاشت المعارضة الشريفة
عاش سواق التاكسي
0 اترك تعليق:
Post a Comment